TRAVELBOOK NOW!

Sunday, December 26, 2010

A review of my book " Bakla Bakla Paano Ka GInawa ? "

Here's a review of my book " Bakla Bakla Paano Ka Ginawa ? " by Noel De Leon in his Facebook account:

Mga Eklay ni Edgar Portalan: Ang Pagbasa ng ‘Bakla, Bakla Paano Ka Ginawa’ at ang paghihintay ...

by Noel de Leon on Saturday, December 18, 2010 at 7:26am

Mga Eklay ni Edgar Portalan: Ang Pagbasa ng ‘Bakla, Bakla Paano Ka Ginawa’ at ang paghihintay ng susunod na librong ‘Paano Kung Wala Nang Bakla sa Mundo’

Ni Noel de Leon/ Isla Guimaras/ Disyembre 2010

NANG magkita kami ni Danton Remoto sa Christmas Party ng Metropolitan Community Church sa Quezon City ay ipinaalala nitong muli sa akin ang isa sa mga bagay na dapat ginagawa nating mga manunulat, ang pagi-edit at patuloy na pagi-edit ng mga gawa natin bago ipabasa sa iba o ipablis bilang libro o entry sa ating mga blog. Ito rin ang isa sa pinakamahalagang bagay na natutuhan ko sa Linangan sa Imahen, Retorika, at Anyo habang sumasailalim ako sa klase ni Virgilio S. Almario. Ito rin ang bagay na hindi ko makakalimutan na ikinoment sa akin ni Glecy Atienza at Ruel Molina nang ipabasa ko sa kanila ang dula kong may working title na Wanted: Vaginal Repair. Ngayon na nasa matahum na isla na ako ng Guimaras at ninanamnam ang dalisay na hangin ng Disyembreng malamig ay bigla-biglang bumalik sa akin ang gahum ng patuloy na pagi-edit at pagkatuto sa mga ini-edit.

Bago ako tuluyang umuwi ng Guimaras ay namili muna ako ng libro sa National Bookstore. Ang dalawa rito ay pangregalo, at ang dalawa naman ay babasahin ko sa byahe papuntang Guimaras. Isa sa mga nabili ko ay ang libro ni Edgar Portalan na may pamagat ‘Bakla, Bakla Paano Ka Ginawa’ na ipinablis ng Atlas Publishing. Ito ang unang aklat ng Atlas na mababasa ko. At dahil patungkol ito sa pakikipagsapalaran ni Edgar sa pagiging buhay bading ay sigurado akong maganda ito at entertaining.

Ito ang unang pagkakataon na nabasa ko ang pangalang Edgar Portalan. Sa tagal ko nang nagbabasa at nanonood ng mga akda at pelikulang patungkol sa ‘gay isyu’ ay hindi ko pa narinig o nakasalubong ang pangalang ito. Interesting. Masyadong matapang ang title ng libro. Kaya kaya nitong higitan o pantayan ang mga naging pagbasa ko na sa mga libro nina Danton Remoto, John Iremil E. Teodoro, at Louie Cano kung patungkol sa buhay bading ang pag-uusapan. Tingnan natin.

Pagiging Bading na Kristiyano ang paninindigan ng librong ito. Sa Unang pahina pa lamang ng libro ay mababasa na ang pangalan ng Diyos. Susundan ito ng pag-amin ng nagsasalaysay na bakla siya. At iisa-isahin na niya ang mga bagay na nagpapatunay o ang pagdiskobre niya na siya ay isang ganap na bading. Masyadong personal ang pagbanggit ng mga tagpo at bagay sa mga salaysay sa librong ito, walang problema rito. Ngunit, kung babasahin at pag-aaralan ang librong ito ni Edgar ay maaaring sabihing nagmadali ang publisher sa paglilimbag ng libro na kahit ang awtor mismo ay hindi man lamang nasagot ang title ng kanyang libro, kung paano nga ba ginagawa ang isang bakla.

Kung titingnan ng mabuti, wala naman talagang sinabing bago si Edgar sa una nitong libro. Ipinakilala lamang niya ang sarili nito sa atin, ipinaalalang muli ang ilang bagay na natatakot tayong mabasa, dahil totoo.

Patuloy ang hamon para kay Edgar Portalan na higitan o kung hindi man ay pantayan ang mga nangungunang mga gay writers sa ating bansa ngayon. Patuloy ang hamon na sana matapos na mabasa ang sanaysay na ito ay basahin niya ang ilang libro nina Remoto, Teodoro, Cano, Garcia at iba pang mga magagaling at natatanging gay writers ngayon sa ating bansa, ang Filipinas.

Sa ngayon, hihintayin ko muna ang muling paglabas ng libro ni Edgar na may pamagat ‘Paano Kung Wala Nang Bakla sa Mundo’ na sigurado na akong kayang higitan ang nauna nitong libro. Nakakatuwa, nakakaaliw ang naging pagbasa ko kay Edgar, pero parang may hinahanap pa ako. Baka nasa ikalawa nitong libro.http://noeldeleon.blogspot.com/

No comments:

Post a Comment